शेगाव रेल्वे स्थानकावर सापडलेल्या १५ वर्षीय मुलाला आईच्या स्वाधीन; RPF च्या तत्परतेने टळली अनर्थाची शक्यता

शेगाव – प्रतिनिधी

आईच्या रागामुळे घर सोडून अकोल्याहून शेगाव येथे आलेल्या १५ वर्षीय मुलाला रेल्वे सुरक्षा बलाच्या (RPF) सतर्कतेमुळे सुखरूप शोधून त्याच्या आईच्या स्वाधीन करण्यात आले. या संपूर्ण प्रक्रियेत रेल्वे सुरक्षा बलाचे सहायक उपनिरीक्षक रंजन तेलंग यांनी दाखविलेली तत्परता, संवेदनशीलता आणि कायदेशीर प्रक्रियेचे पालन यामुळे एका कुटुंबाला मोठा दिलासा मिळाला.

घटनेची माहिती अशी की, अकोला येथील १५ वर्षीय मुलगा आईच्या रागामुळे कोणालाही न सांगता घरातून निघून शेगाव रेल्वे स्थानकावर आला होता. स्थानक परिसरात मुलाच्या चेहऱ्यावरील घाबरलेले भाव आणि संशयास्पद हालचाली पाहून शेगाव रेल्वे स्थानकाचे स्टेशन प्रबंधक मोहन देशपांडे यांनी परिस्थितीचे गांभीर्य ओळखले आणि तत्काळ रेल्वे सुरक्षा बलाला माहिती दिली.

माहिती मिळताच सहायक उपनिरीक्षक रंजन तेलंग यांनी तातडीने घटनास्थळी पोहोचून मुलाला विश्वासात घेत विचारपूस केली. त्यावेळी मुलाने आईच्या रागामुळे घर सोडल्याची माहिती दिली. त्यानंतर त्याच्याकडून मिळालेल्या मोबाईल क्रमांकावरून आईशी संपर्क साधण्यात आला. मुलगा सुरक्षित असल्याचे समजताच त्याची आई अकोल्याहून तातडीने शेगाव येथे दाखल झाली.

</div>