आमदार संजय कुटे यांच्या हस्ते भूमिपूजन सोहळा संपन्न!
शेगाव : श्री संत गजानन महाराजांच्या पावन वास्तव्याने पुनीत झालेल्या संतनगरी शेगावमध्ये आता श्री खाटूश्याम बाबांचे भव्य मंदिर साकार होणार आहे. राजस्थानच्या धर्तीवर उभारण्यात येणाऱ्या या मंदिराचा भूमिपूजन सोहळा पाडव्याच्या शुभमुहूर्तावर मोठ्या उत्साहात आणि भक्तिमय वातावरणात संपन्न झाला. जळगाव जामोद विधानसभा मतदारसंघाचे आमदार डॉ. संजय कुटे यांच्या हस्ते मंदिराचे भूमिपूजन करण्यात आले. या कार्यक्रमाच्या अध्यक्षस्थानी शेगावचे नगराध्यक्ष प्रकाश शेगोकार होते.
आनंद सागर परिसरासमोर साकारणार भव्य मंदिर
संतनगरी शेगावचे धार्मिक वैभव अधिक समृद्ध करणारे हे मंदिर आनंद सागर परिसरासमोरील नियोजित खाटूश्याम नगरीच्या लेआउटमध्ये उभारण्यात येणार आहे. राजस्थानच्या धर्तीवर मंदिराची भव्य रचना साकारण्याचे नियोजन आहे.
या मंदिरामुळे खाटूश्याम बाबांच्या भक्तांसाठी शेगावमध्ये श्रद्धेचे नवे केंद्र उपलब्ध होणार आहे. तसेच शेगावच्या धार्मिक आणि आध्यात्मिक पर्यटनालाही चालना मिळण्याची अपेक्षा व्यक्त होत आहे.
वैदिक मंत्रोच्चारात भूमिपूजन
भूमिपूजन सोहळ्याचे पौरोहित्य पंडित सतीश शर्मा आणि अकोला येथील अन्य पंडितांनी वैदिक मंत्रोच्चारात केले. श्री शामधाम समितीच्या वतीने या कार्यक्रमाचे आयोजन करण्यात आले होते.
यावेळी प्रमुख अतिथी म्हणून विजयबाप्पू देशमुख, माजी नगराध्यक्ष शरद अग्रवाल, जिल्हा सहकारी बँकेचे उपाध्यक्ष गोविंदराव मिरगे, सार्वजनिक बांधकाम विभागाचे खामगाव येथील उपअभियंता प्रवीण पुंडकर, नेत्ररोगतज्ज्ञ डॉ. संजीव राठोड, खामगाव अर्बन बँकेचे अध्यक्ष प्रा. विजय पुंडे उपस्थित होते.
तसेच श्री रामदेव बाबा एवं श्रीश्याम बाबा सेवा समिती, अकोला येथील कार्यकारी संस्थापक सदस्य सुभाष मोहनलाल भट्टड, राजकुमार रतनलाल शर्मा, गजेंद्र मोहनलाल सारडा यांच्यासह डॉ. जयंतकुमार खेळकर, पांडुरंग शेजोळे, अमित देशमुख, ज्ञानेश्वर साखरे आणि संतोष देशमुख यांचीही उपस्थिती होती.
भक्तगणांची मोठ्या संख्येने उपस्थिती
कार्यक्रमाचे सूत्रसंचालन प्रा. प्रशांत देशमुख यांनी केले, तर प्रा. सतीश कलोरे यांनी उपस्थितांचे आभार मानले. यावेळी श्री खाटूश्याम धाम समितीचे पदाधिकारी, सदस्य आणि खाटूश्याम बाबांचे मोठ्या संख्येने भक्तगण उपस्थित होते.
संतनगरी शेगावमध्ये उभारण्यात येणारे हे भव्य श्री खाटूश्याम बाबा मंदिर भाविकांच्या श्रद्धेचे नवे केंद्र ठरण्याची अपेक्षा आहे. या मंदिराच्या उभारणीमुळे शेगावच्या धार्मिक पर्यटनाला नवी दिशा मिळण्यास मदत होईल, अशी भावना यावेळी व्यक्त करण्यात आली.
