महाराष्ट्र बंदला शेगावात प्रतिसाद; विद्यार्थी आंदोलनाच्या समर्थनार्थ वंचित बहुजन आघाडीचे शांततापूर्ण आंदोलन

दिल्लीतील विद्यार्थी आंदोलनाच्या पार्श्वभूमीवर शेगावात महाराष्ट्र बंदला  प्रतिसाद वंचित बहुजन आघाडीचे शांततापूर्ण आंदोलन; अनेक व्यावसायिकांनी ठेवली प्रतिष्ठाने बंद

शेगाव | प्रतिनिधी

दिल्लीतील जंतर-मंतर परिसरात सुरू असलेल्या विद्यार्थी आंदोलनाच्या पार्श्वभूमीवर आणि आंदोलनादरम्यान झालेल्या पोलिस कारवाईच्या निषेधार्थ वंचित बहुजन आघाडी व मित्रपक्षांच्या वतीने पुकारण्यात आलेल्या महाराष्ट्र बंदला शेगाव शहरात प्रतिसाद मिळाला. शहरातील अनेक व्यापाऱ्यांनी स्वयंस्फूर्तीने आपली प्रतिष्ठाने बंद ठेवत आंदोलनाला पाठिंबा दर्शविला.

सकाळच्या सत्रात वंचित बहुजन आघाडीचे पदाधिकारी, कार्यकर्ते आणि समर्थकांनी शेगाव शहरात शांततापूर्ण पद्धतीने आंदोलन केले. आंदोलकांनी विद्यार्थी हिताच्या मागण्यांकडे शासनाने गांभीर्याने लक्ष द्यावे, अशी भूमिका मांडली. आंदोलनादरम्यान कायदा व सुव्यवस्थेचा कोणताही प्रश्न निर्माण झाला नाही.

विना चेहऱ्याच्या आंदोलनाची नवी दिशा; जंतर-मंतर आंदोलनाचे देशभर पडसाद | संपादकीय

आंदोलनकर्त्यांच्या म्हणण्यानुसार, दिल्लीतील जंतर-मंतर येथे मागील काही आठवड्यांपासून विविध शैक्षणिक प्रश्नांसंदर्भात विद्यार्थी आंदोलन सुरू आहे. या आंदोलनाच्या अनुषंगाने त्यांनी शिक्षण व्यवस्थेतील कथित अनियमिततेची चौकशी, संबंधित जबाबदारांवर कारवाई, आंदोलनकर्त्यांबाबत निर्णय आणि विद्यार्थ्यांच्या विविध मागण्यांवर तातडीने सकारात्मक भूमिका घेण्याची मागणी केली.

वंचित बहुजन आघाडीने पुकारलेल्या महाराष्ट्र बंदला राज्यातील विविध भागांतही प्रतिसाद मिळाल्याचे वृत्त विविध प्रसारमाध्यमांतून समोर येत आहे. शेगावमध्येही व्यापारी, नागरिक आणि कार्यकर्त्यांच्या सहभागामुळे बंद शांततेत पार पडल्याचे चित्र पाहायला मिळाले.

विद्यार्थ्यांच्या प्रश्नांवर शासनाने संवाद साधून तोडगा काढावा, अशी अपेक्षा आंदोलनकर्त्यांनी व्यक्त केली. आंदोलनाचा केंद्रबिंदू शिक्षण व्यवस्थेतील पारदर्शकता, विद्यार्थ्यांचा न्याय आणि भविष्यात अशा घटना टाळण्यासाठी प्रभावी उपाययोजना करण्यावर असल्याचे आंदोलनकर्त्यांनी स्पष्ट केले.