कोल्हापूर, प्रतिनिधी : महाराष्ट्रातील लाखो भाविकांचे श्रद्धास्थान असलेल्या कोल्हापूर जिल्ह्यातील आदमापूर येथील संत बाळूमामा देवस्थान ट्रस्ट पुन्हा एकदा चर्चेच्या केंद्रस्थानी आले आहे. ट्रस्टच्या कारभारात सुमारे 60 कोटी 75 लाख रुपयांच्या कथित आर्थिक गैरव्यवहाराचा आरोप करण्यात आला असून, या प्रकरणी तत्कालीन उपनिबंधक रागिणी खडके यांच्यासह तिघांविरुद्ध गुन्हा दाखल करण्यात आला आहे. प्रकरणाचा तपास सुरू असून, आरोपांमुळे भाविकांमध्येही मोठी खळबळ उडाली आहे.
तक्रारीनुसार, देवस्थान ट्रस्टच्या मालकीच्या जमिनींची खरेदी-विक्री, देणगीची नोंद, दागिने तसेच बकऱ्या-मेंढ्यांच्या विक्रीसंदर्भातील व्यवहारांमध्ये मोठ्या प्रमाणावर अनियमितता झाल्याचा आरोप करण्यात आला आहे. या सर्व व्यवहारांत आर्थिक अपहार झाल्याचा दावा तक्रारदारांनी केला असून, त्याआधारे संबंधितांविरुद्ध गुन्हा नोंदविण्यात आला आहे.
आरोपांमध्ये सर्वाधिक गंभीर बाब म्हणजे ट्रस्टच्या निधीतून खरेदी करण्यात आलेल्या जमिनींच्या व्यवहारांबाबत आहे. काही जमिनींची खरेदी बाजारभावापेक्षा अनेक पटींनी जास्त किमतीने दाखविण्यात आल्याचा दावा करण्यात आला आहे. तक्रारीनुसार, सुमारे 20 लाख रुपये बाजारमूल्य असलेली जमीन दुरुस्ती दस्ताच्या माध्यमातून तब्बल 3 कोटी रुपये दाखविण्यात आल्याचा आरोप आहे. याशिवाय ट्रस्टच्या नावावर खरेदी करण्यात आलेल्या 23 जमिनींपैकी काहींच्या नोंदी अपूर्ण असल्याचा, तर काही कागदपत्रांमध्ये तफावत असल्याचाही उल्लेख करण्यात आला आहे.
</div>
देणगी व्यवस्थापनाबाबतही गंभीर प्रश्न उपस्थित करण्यात आले आहेत. दानपेटीतून जमा होणाऱ्या रकमेच्या नोंदी, सोन्या-चांदीच्या दागिन्यांची नोंद आणि त्यांच्या सुरक्षिततेबाबत अनियमितता झाल्याचा आरोप तक्रारीत करण्यात आला आहे. तसेच ट्रस्टकडे असलेल्या बकऱ्या व मेंढ्यांच्या विक्री व्यवहारांतही मोठ्या प्रमाणावर आर्थिक गैरव्यवहार झाल्याचा दावा करण्यात आला असून, या व्यवहारांमध्ये सुमारे 41 कोटी रुपयांच्या कथित अनियमिततेचा उल्लेख तक्रारीत आहे.
तक्रारदारांनी बनावट कागदपत्रांच्या आधारे आर्थिक व्यवहार करण्यात आल्याचा, विश्वासघात, फसवणूक आणि खोट्या नोंदी तयार करण्यात आल्याचाही आरोप केला आहे. या आरोपांच्या आधारे तत्कालीन उपनिबंधक रागिणी खडके यांच्यासह तिघांविरुद्ध गुन्हा दाखल करण्यात आला आहे. दरम्यान, रागिणी खडके अद्याप तपास यंत्रणांच्या हाती लागल्या नसल्याची माहिती समोर येत असून, त्यावरून तपासाच्या गतीबाबतही प्रश्न उपस्थित होत आहेत.
तक्रारदारांच्या म्हणण्यानुसार, तत्कालीन सहाय्यक धर्मादाय आयुक्त निवेदिता पवार यांच्या कार्यकाळात हा कथित गैरव्यवहार घडला. तसेच रागिणी खडके यांची नियुक्तीही संगनमताने करण्यात आल्याचा आरोप करण्यात आला आहे. मात्र, या आरोपांबाबत संबंधितांकडून अधिकृत भूमिका समोर आलेली नाही.
दरम्यान, या संपूर्ण प्रकरणाचा तपास सुरू असून, आरोपांची सत्यता न्यायालयीन आणि तपास प्रक्रियेनंतरच स्पष्ट होणार आहे. राज्यभरातील लाखो भाविकांच्या श्रद्धेशी निगडित असलेल्या या देवस्थानातील कथित आर्थिक अनियमिततेमुळे पारदर्शक प्रशासन, नियमित लेखापरीक्षण आणि देणगी व्यवस्थापनावरील नियंत्रणाची गरज पुन्हा एकदा अधोरेखित झाली आहे.
Pingback: महाराष्ट्रात अनालॉग पनीरवर निर्बंध; ग्राहकांची फसवणूक रोखण्यासाठी सरकारची मोठी कारवाई - E-Jansamuh News